INDIAN 7

கிரிஸ் கெயிலின் மாபெரும் வரலாற்று சாதனையை உடைத்த நிக்கோலஸ் பூரான்!

03 செப்டம்பர் 2024 02:34 AM | views : 66

வெஸ்ட் இண்டீஸ் கிரிக்கெட் அணியை சேர்ந்த முன்னாள் அதிரடி ஆட்டக்காரரான கிரிஸ் கெயில் டி20 போட்டிகளில் நிகழ்த்தாத சாதனையே இல்லை என்று கூறலாம். அந்த அளவிற்கு டி20 கிரிக்கெட்டில் மலை போன்ற ரன்களையும், சதங்களையும் விளாசிள்ளார். அதுமட்டுமின்றி கடந்த சில ஆண்டுகளுக்கு முன்னர் வரை அவர் டி20 கிரிக்கெட் தொடர்ச்சியாக விளையாடி வந்தார்.

அந்த வகையில் டி20 கிரிக்கெட்டில் ஏகப்பட்ட சாதனைகளை நிகழ்த்தியுள்ள கிரிஸ் கெயில் ஒரே ஆண்டில் அதிக டி20 சிக்ஸர்களை அடித்த வீரராகவும் முதலிடத்தில் இருந்தார். கடந்த 2015-ஆம் ஆண்டு மட்டும் டி20 போட்டிகளில் அவர் 135 சிக்ஸர்களை விளாசி இருந்தார்.

இந்நிலையில் தற்போது ஒன்பது ஆண்டுகளுக்குப் பிறகு கிரிஸ் கெயிலின் அந்த இமாலய சாதனையை அதே நாட்டை சேர்ந்த சக வீரரான நிக்கோலஸ் பூரான் முறியடித்து அசத்தியுள்ளார். வெஸ்ட் இண்டீஸ் அணியைச் சேர்ந்த இளம் அதிரடி ஆட்டக்காரரான நிக்கோலஸ் பூரான் கடந்த பல ஆண்டுகளாகவே அதிரடியான ஆட்டத்தை வெளிப்படுத்தி மதிப்புமிக்க வீரராகவே இருந்து வருகிறார்.

இந்நிலையில் இந்த 2024-ஆம் ஆண்டில் மட்டும் நிக்கோலஸ் பூரான் ஒட்டுமொத்த டி20 போட்டிகளையும் சேர்த்து தற்போது 139 சிக்ஸர்களை விளாசி கெயிலின் அந்த சாதனையை முறியடித்துள்ளார். எந்த வகையான கிரிக்கெட் போட்டிகளாக இருந்தாலும் அதிரடியான ஆட்டத்தை வெளிப்படுத்தும் பூரான் டி20 போட்டிகளில் மிகவும் அதிரடியாக விளையாடக் கூடியவர்.

மிகப் பிரமாண்டமான சிக்சர்களை எளிதாக அடிக்க பெயர் போன பூரான் தற்போது கெயிலின் அந்த சாதனையை முறியடித்துள்ளார். நடைபெற்று முடிந்த ஐபிஎல் தொடரில் லக்னோ அணிக்காகவும் அசத்தலான ஆட்டத்தை வெளிப்படுத்தி இருந்தார்.


அதன் காரணமாக அடுத்த ஆண்டு லக்னோ அணியின் கேப்டன் கே.எல் ராகுல் கேப்டன் பதவியில் இருந்து வெளியேறும் பட்சத்தில் அவருக்கு பதிலாக லக்னோ அணியின் புதிய கேப்டனாகவும் அவர் நியமிக்கப்பட வாய்ப்புள்ளது குறிப்பிடத்தக்கது.