வெஸ்ட் இண்டீஸ் மண்ணில் இறுதிக்கட்டத்தை தொட்டுள்ள ஐசிசி 2024 டி20 உலகக் கோப்பையில் இந்திய கிரிக்கெட் அணி செமி ஃபைனல் சுற்றில் விளையாட உள்ளது. இத்தொடரில் லீக் மற்றும் சூப்பர் 8 சுற்றில் தோல்வியை சந்திக்காமல் வெற்றி நடை போட்டு வரும் இந்திய அணி செமி ஃபைனலில் ஜூன் 27ஆம் தேதி இங்கிலாந்தை கயானா நகரில் எதிர்கொள்கிறது.

முன்னதாக இந்தத் தொடரில் நம்பிக்கை நட்சத்திரம் விராட் கோலி பேட்டிங்கில் ஒரு அரை சதம் கூட அடிக்காமல் தடுமாறி வருகிறார். பேட்டிங் துறையின் முதுகெலும்பாக கருதப்படும் அவர் இப்படி சுமாரான ஃபார்மில் இருப்பது இந்திய அணிக்கு பின்னடைவாகவே பார்க்கப்படுகிறது. அதே போல முதன்மை சுழல் பந்து வீச்சு ஆல் ரவுண்டரான ரவீந்திர ஜடேஜாவும் இதுவரை பேட்டிங்கில் அசத்தவில்லை.

அதே போல பந்து வீச்சிலும் சமாராக செயல்படுவதால் அவருக்கு கேப்டன் ரோஹித் சர்மா நம்பி முழுமையான வாய்ப்பு வழங்குவதில்லை. எனவே அவரை அணியிலிருந்து நீக்கிவிட்டு சஞ்சு சாம்சன் போன்ற இதர வீரர்களுக்கு வாய்ப்பளிக்கலாம் என்று ஒருதரப்பு ரசிகர்கள் தெரிவித்து வருகின்றனர். இந்நிலையில் பேட்டிங்கில் ரன்கள் அடிக்காவிட்டாலும் ஃபீல்டிங்கில் அற்புதமாக செயல்பட்டு 20 – 30 ரன்களை ரவீந்திர ஜடேஜா சேமிப்பதாக சுனில் கவாஸ்கர் தெரிவித்துள்ளார்.

எனவே தொடர்ந்து அவர் பிளேயிங் லெவனில் இருக்க வேண்டும் என்று தெரிவிக்கும் கவாஸ்கர் இது பற்றி ஸ்டார் ஸ்போர்ட்ஸ் தொலைக்காட்சியில் பேசியது பின்வருமாறு. “அவர் மிகவும் அனுபவமிக்கவர் என்பதால் நான் கவலைப்படவில்லை. தமக்குக் கிடைத்த வாய்ப்புகளில் அவர் இப்போதும் நன்றாகவே செயல்பட்டுள்ளார். இந்த நேரத்தில் தன்னுடைய அற்புதமான ஃபீல்டிங் திறன், கேட்சுகளைப் பிடிப்பது, ரன் அவுட் செய்வது போன்றவற்றால் அவர் 20 – 30 ரன்களை சேமிக்கிறார் என்பதை மறந்து விடாதீர்கள்”

“அந்த 20 – 30 ரன்களை மறக்க வேண்டாம். அதன் பின் களத்திற்கு வரும் அவர் பேட்டிங் மற்றும் பந்து வீச்சில் செய்யும் அனைத்தும் அவருடைய திறனுக்கு மதிப்பை சேர்க்கும் அம்சமாகும். எனவே ரவீந்திர ஜடேஜா பற்றி நாம் கேள்வி எழுப்ப வேண்டும் என்று நினைக்கவில்லை. 2 போட்டிகள் நன்றாக செல்லவில்லை என்றால் இவரை வைத்து என்ன செய்வது? என்று பேசுவதே இந்தியா மற்றும் இந்திய ரசிகர்களின் பிரச்சினையாகும்”


“அதுவே கவலை என்பது உங்களுக்கு தெரியும். பொதுவாக யார் எந்த தொழில் ஈடுபட்டாலும் 2 தவறை செய்தால் அதை யாரும் கேட்க மாட்டார்கள். ஆனால் விளையாட்டில் இது தொலைக்காட்சியில் பேசுவதற்கு நல்ல விவாத பொருள். எனவே பிளேயிங் லெவனில் நீங்கள் ஜடேஜாவின் இடத்தை பற்றி கேள்வி எழுப்பக் கூடாது. அவர் ஒரு ராக் ஸ்டார்” என்று கூறினார்.

மேலும் இதுபோன்ற செய்திகளை உடனுக்குடன் தெரிந்துகொள்ள
E7 Tamil Whatsapp Channel-ஐ Follow பண்ணுங்க
Whatsapp Channel Link:- https://whatsapp.com/channel/0029Va9LGy4FXUuiUvhKXV1S